政壇：貪曾昔日愛將盧維思連環衝燈
「貪曾」前特首曾蔭權爵士昔日愛將、後因維港巨星匯醜聞而同貪曾反面兼對簿公堂嘅投資推廣署前署長盧維思，自○八年退休後，雖然唔再經常喺鎂光燈下出現，但依然經常現身中環。
盧維思（前）喺太子大廈對開馬路，向滙豐銀行總行方向先衝紅燈。
第二次衝燈後，盧維思（箭嘴示）更錯望車流方向。
行至前政總西座，盧第三次衝燈，唔知咁急去邊呢？
冇見一排，盧維思身形依舊「大大件」，但行走中環不但健步如飛，更無視交通燈號，先後喺皇后大道中同雪廠街連衝三支紅公仔燈號，再沿雪廠街斜路上斜絕塵而去，似乎真係好趕喎。
上周五下晝約四點鐘，喺中環太子大廈對開撞到行色匆匆嘅盧維思，雖然佢身穿普通嘅黑色西裝，但依然難掩其相當有「福氣」嘅身形，驟眼睇以為佢嘅「肉背突」咗個「駝峰」添！兩手空空吊吊揈嘅盧維思，先喺德輔道中太子大廈對開馬路熟練地衝第一支紅燈，行到中間安全島向右望一望車流，然後再衝第二支燈。
視交通規則無物
其實正當盧維思再次衝燈嗰時，公仔燈已經準備轉綠色，大部分途人都唔爭在等嗰幾秒，但盧維思有理冇理，見冇車駛近就直衝，仲睇錯車流方向，以為啲車從右面駛嚟，其實啲車從左邊駛過嚟o架，認真危險。
連過兩條相當「牙煙」嘅馬路後，盧維思沿雪廠街經嘉軒廣場行去，行經前中區政府合署西座嗰陣，又再一次衰衝動唔睇燈，見啲車停咗喺度就過。明明紅燈轉眼就變成綠燈，但佢都急急腳直衝，由太子大廈行至前政府總部西座都不過兩分鐘，之後再沿雪廠街斜路上斜，好快就冇咗蹤影喇，估唔到佢年過六十五歲，都依然老當益壯，但小心被執法人員檢控罰錢呀。
