政壇：比特幣攻港財金官冇符
虛擬貨幣Bitcoin（比特幣）熱潮殺入本港，雖然普及程度唔算好高，市場亦唔見太大炒風。不過，自從市場傳出本港月底將會出現首台比特幣櫃員機後，令比特幣即時炒到上近千美元一枚。面對呢個情況，聽聞政府內部都冇晒符，因為現時既無條例可以監管，政府亦無可能特登立法規管一個虛擬貨幣，因為咁做等同認可其價值。所以政府只能「出口術」，靠財金官員喺公開場合呼籲市民投資比特幣小心啲。
設計圖片及對白
價格波動風險高
用「大上大落」嚟形容比特幣走勢，應該無錯。舊年初一枚比特幣只值十幾美元，但七月中經互聯網宣傳後，已升值至四百多美元，年底更傳出國內網站接受比特幣付款，更令比特幣升穿一千美元大關，可惜內地多個部委發出聲明封殺，比特幣又即時暴跌三成。最近流傳香港有首台比特幣櫃員機，價格又升番至千元美元水平。
中國同唔少東南亞國家，因為有外匯管制，晨早講明禁止比特幣流通。不過，香港冇外匯管制，冇得用呢招，所以就算香港真係出現第一部比特幣櫃員機，政府都只能夠當佢係一部汽水機，唔可以作出任何監管。所以大家只會見到財爺鬍鬚曾、財經事務及庫務局局長「傻強」陳家強兩人「出口術」，無論喺公開場合定係官方網誌，都只叫市民投資時謹慎，注意比特幣風險，政府除此之外，就冇其他嘢可以做。
香港出名自由度高，就算比特幣熱潮漸退，科技日新月異下，呢類電子虛擬貨幣出現只會有增無減，政府係時候認真諗吓有乜計可以監管，否則隨時衝擊本港貨幣體制，到時就大件事喇！
