內地客增長放緩 旅遊業逆水行舟

嗱，中國社會科學院發表綠皮書，預計今年內地訪港旅客將突破四千一百萬人次，雖然仍有增長，但係增幅進一步放緩，由舊年嘅百分之十二下降至百分之七。即係話，本港旅遊業前進乏力，疲態漸露，如果再唔諗辦法注入新動力，隨時翻艇下沉，被人淘汰o架！

點解內地旅客增幅持續放緩呢？社科院係咁講嘅，香港空間及資源有限，配套設施不足，旅客規模不可能保持高比例增長，加上市場生態變化，內地旅客可以選擇嘅旅遊地區愈來愈多，而高消費能力嘅內地客大部分已經到過香港，過去高增長嘅情況好難再出現喎。

咁就有危機喇，旅遊業係香港經濟支柱之一，而內地客又係支柱中嘅支柱，零售、酒店、飲食等行業能夠維持目前嘅局面，全靠內地財神爺頂住嘅咋，如果訪港內地客繼續萎縮，整體經濟一定受到衝擊。正所謂，一榮俱榮，一損俱損，內地旅客對香港興趣減退，唔止為旅遊業敲響警鐘，仲隨時係本地經濟衰退嘅先兆添吖。

正如社科院話齋，香港旅遊業本來擁有唔少發展動力，一來內地推動以香港為母港嘅郵輪旅遊發展，二來人民弊升值大大增加內地同胞來港掃貨嘅意欲，如果港府識得把握機會，謀劃長遠，點使擔心內地旅客捨近圖遠，過門而不入吖。所以話，內地客增幅放緩，關鍵始終係港產官僚不思進取，坐失商機。試諗吓，內地旅客多年來持續激增，但本港旅遊配套設施，例如景點及酒店房間有冇增加吖？

旅遊配套冇增加不特止，仲不時發生趕客現象添。隨着內地客愈來愈多，中港矛盾不斷惡化，有人要求削減個人遊，有人要求煞停一簽多行，有人甚至叫「中國人滾回中國去」，家陣終於不幸而言中嘞，內地客紛紛轉去外國旅遊掃貨，咁對香港係好事咩？港人鍾意又好，唔鍾意又好，都無法否認一個事實，內地旅客已經成為本港經濟增長不可或缺嘅動力，家陣全世界都歡迎中國旅客，如果香港拱手讓人，實在太愚不可及嘞。

講來講去，都係港府無能累事。如果唔係港產官僚鼠目寸光，一事無成，淨係識得食老本，搞到旅遊資源及設施長期不足，中港矛盾又點會激化吖，港產官僚如果唔想「被潛水」，咁就要速速補鑊喇，叮！