SUN搞作：網絡小說：誰憐土豪金
金仔是內地醫科畢業生，雖然出身土豪之家，但求學卻沒有放鬆，因為從小到大，他都希望做一個有用的人。這天，金仔爸爸要跟兒子談談未來路向。
「金仔，將來打算做乜？」
「阿爸，苦讀咁多年，我要去醫院做醫生，拯危救傷，一展所長！ 」
「荒謬！去醫院做醫生有乜用？你知唔知幾多豆腐渣醫院？冧一幢都死幾百個啦！一啲都唔矜貴！」
「吓？咁你由細到大叫揀醫科為乜？」金仔一臉疑惑。
「梗係想你做家庭醫生啦！我哋咁大個家族，有個家庭成員做醫生，幫我哋睇吓傷風感冒，咪就係家庭醫生囉！明未？」金仔爸爸自豪地說。
「……我想有自己事業！」
「咪一早準備好囉！十歲送咗間酒店畀你，廿歲送咗個法國酒莊畀你，事業一早就如日中天，仲想點？仔，做人要腳踏實地，唔好一步登天！過兩年先送埋間公司畀你啦！咳咳咳……」
「阿爸，你唔舒服？等我幫你睇睇……」
「唔好！你幫我約李醫生啦！其他人唔知就話啫，你個醫科學位，係我捐五百萬畀學校換番嚟o架！所以話你個傻仔，咁勤力讀書做乜……」
