SUN搞作：少膽虫手記：新年要「溶」洽
「少膽虫，同我入嚟。」淫賤黎嘅語氣比平日和藹百倍，以前叫少膽虫一定係「躝出躝入」，搞到少膽虫日日都要前躝同後躝……嗰種出出入入、畀人當奴隸嘅痛，真係一言難盡。所以，淫賤黎突然嚟個大轉變，少膽虫即刻有種不祥預感。
「腦細，叫我咩事？」少膽虫口震震問。淫賤黎舉起一張紙，問道︰「少膽虫，呢個係咩字？」少膽虫一睇，倍感親切，「腦細，有個虫字邊，呢個係咩虫嘅名？」淫賤黎搖搖頭，「你就虫，呢個係融洽個『融』字呀！」
少膽虫再次嚇一跳，少膽虫講錯嘢竟然唔使捱打，「咁……即係點呢腦細？」淫賤黎嘆道︰「睇到呢個『融』字，我就覺得自己太獨裁，仲成日搞到你『啪啪啪』聲、八月十五又要睇醫生，為咗一己私欲，搞到《爛果》咁唔融洽，依家希望我哋可以冰融霧釋。」聽到呢度，少膽虫眼泛淚光，「腦細……」少膽虫都未講完，淫賤黎又再開口︰「既然大家咁融洽，依家公司有困難，就想你可以共渡難關，今年花紅就……」
融就係融，不過係「溶」咗少膽虫咁解……
