城中鏡：鄭恩賜派利是封宣傳強積金
積金局不嬲都好揼本做宣傳，關於半自由行嘅宣傳效果都唔錯，但好多人都仲係對呢件事一知半解。於是佢哋趁農曆新年就快到，積金局機構事務總監鄭恩賜尋日就落銅鑼灣派利是封，順便宣傳積金台首播。
鄭恩賜（左）尋日落銅鑼灣派利是封，橙色嘅利是封咁sharp，好多人排隊拎！
上載短片力谷
今次積金局派利是封，又拍短片放上網，無非係想加強大眾對強積金嘅認知，鄭恩賜話短片內容環繞預設基金、未知價、周年權益報表等。唔好睇小呢啲宣傳，好似半自由行咁，推出咗成年，仲有好多人唔清唔楚，尋日就有位女士問在場嘅積金局同事，自僱人士可以點樣轉會？
自僱人士同一般打工仔唔同，因為佢哋想揀乜嘢積金計劃都得，即係話，佢哋唔使等強積金半自由行都可以轉會囉！講到全自由行幾時有，鄭恩賜就話希望喺明年底遞交建議書畀政府喎！
呢排有消息話政府可能會分階段取消對沖機制，換言之，僱主唔可以再用強積金供款支付長期服務金，鄭恩賜話取消對沖機制牽涉好多僱主、僱員，需要多啲討論，好難估計幾時可以落實。佢仲話，即使唔能夠取消對沖機制，積金局都有辦法令強積金全自由行繼續推進。
