城中鏡：馬紹祥跟波波去立會
政府早前宣布由熟悉大型基建同發展項目嘅工程師Eric馬紹祥出任發展局副局長，佢今個星期正式上任，尋日就跟住局長「波波」陳茂波去立法會熟習新環境，全程粒聲唔出表現低調。
馬紹祥第三日返工，就跟局長陳茂波去立法會熟習環境。
Eric曾經喺多間工程顧問公司出任要職，負責多項政府大型工程，例如機場第三條跑道、廣深港高鐵部分項目等。佢話喺政府任職同之前幫私人公司打工有好大分別，依家份工有唔少挑戰性。被問到將來主要負責邊啲政策範疇，佢就話自己初嚟埗到，暫時未同局長傾到分工問題，首要工作都係要盡快熟習新環境喎！
為咗令新副局長可以盡快投入工作，波波尋日專誠帶埋Eric去立法會回答議員質詢。不過，Eric話早前不時會代表公司去立法會解畫，所以對立法會已有一定認識。睇嚟Eric不但喺大型基建發展項目上有豐富歷練，仲連回答議員質詢都有經驗，相信可以減輕波波嘅煩惱。
