城中鏡：西瓜皮炒冷飯米嘥嘢
為咗響應「惜食」，唔好做「大嘥鬼」，環保團體地球之友近日邀請咗包括環境局局長黃錦星、周中、余健志（Jacky Yu）同Kit Mak等十二位城中名廚同名人，分享自家廚餘食譜，並收錄喺新出版嘅《食得唔好嘥》食譜內。
黃錦星與象徵眼闊肚窄嘅「大嘥鬼」合照。
地球之友高級環境事務主任周月翔（左起）、名廚譚健偉同余健志亦參與拍攝短片。
黃錦星喺食譜中教煮「米嘥嘢」素菜炒冷飯。
黃錦星係首次撰寫食譜，教市民煮一道名為「米嘥嘢」嘅菜式，以冷飯、西蘭花莖、乾冬菇蒂、西瓜皮等家常剩餘材料，湊合成一道健康低碳嘅素炒飯，務求做到「食得唔好嘥」。向來喜歡喺屋企親自下廚嘅佢，寫食譜自然有文有路，菜式簡單易學，更連平日甚少用來作菜嘅西瓜皮都能善用，西瓜皮味道清新，學識煮呢道菜後，夏天就可以減少唔少廚餘。
周中、肥媽Maria Cordero、Jacky Yu、網絡紅人cooking hayhay同米芝蓮食肆主廚曾國生等均有參與撰寫環保食譜。其中五位大廚更親自參與拍攝教學短片。
周中示範食盡柚子
廚藝了得嘅周中師傅搞笑形象深入民心，喺烹飪教學短片中示範如何能將一個柚子「食到盡」嘅時候亦不忘發揮幽默本色，同嘉賓主持陳淑莊大放笑彈，教大家用盡柚子嘅「外衣」（柚皮）同「內衣」（包裹柚肉嘅半透明膜）製作菜式，將整個柚子由外食到內。
