政壇：搞搞政：泛民政改方案陷大分裂

真普選聯盟尋日開記招，係想講明佢哋只得一個普選特首嘅「三軌方案」，包括公民提名、政黨提名及提名委員會（提委會）提名，三項提名缺一不可。點知真普聯未開記者會前，公文袋嘅湯家驊已搶閘炮轟真普聯點解要「缺一不可」，仲諷刺話如果中央唔使提委會，只准公民提名同政黨提名，難道真普聯又因為「缺一不可」而拒絕支持政改？

「缺一不可」立場遭炮轟

泛民喺一○年試過「五區公投」，社民連同人民力量就喺今次政改再為辭職公投「撥火」，但湯家驊就「淋水」話上次五區公投遭建制派杯葛，連泛民內部都唔撐，再搞公投都係冇乜用。至於電子公投多數係「自己友」參與，究竟係咪代表真正民意，連佢都唔清楚。照咁睇，湯家驊無論同自己黨或泛民主流都有好大分歧，唔知幾時先會走到退黨呢一步呢？

直到真普聯記者會，又爆發另一場泛民分裂戰。社民連「長毛」梁國雄劈頭第一句就要白鴿黨單仲偕交代，係咪會接受公民提名以外嘅方案，仲話呢條底線冇得退讓，否則真普聯不如解散好過，唔好為團結而團結。嘩，長毛開火後，連人民力量「慢必」陳志全都向白鴿黨發炮，講明三軌方案「缺一不可」，如果白鴿黨求其要一軌，唔該即刻離開真普聯。

單仲偕唔知係咪被人噴到面懵懵，竟然轉身走人話要去開會，十五分鐘後至返，令現場氣氛達致冰點。搞到六國大封相，真普聯召集人鄭宇碩只好死頂打圓場，話一早估到泛民有分裂嘅一日，已經諗定辭職時講乜好。政圈有金句叫「泛民根本無分裂嘅本錢」，究竟係咪泛民政治智慧低唔明呢個道理呢？