政壇：壞孩子離婚改捐錢習慣
有「壞孩子」之稱嘅英國對沖基金TCI創辦人霍恩，旗下規模四十八億英鎊嘅旗艦基金Master Fund舊年錄得高達百分之四十七回報，但每年將部分盈利撥去慈善機構嘅習慣可能有變，唔係因為佢冇咗善心，而係離婚所致。
好多人都知，狙擊企業時作風強悍嘅霍恩，自○三年成立TCI以來，大部分年度利潤都會自動捐給由妻子成立嘅慈善機構CIFF，改善貧窮兒童生活。透過TCI同CIFF嘅關係，霍恩曾於五年內捐出超過十億英鎊，淨係○八年就豪捐四億六千六百萬英鎊，相信係英國史上最大筆捐獻。
可惜，二人舊年離婚後，TCI同CIFF嘅關係亦生變，TCI再無法律義務向CIFF捐獻利潤。可以想像，喺慈善界引入革命性轉變嘅CIFF，很可能失去急速增長嘅動力；霍恩則可能成為TCI去年可觀回報嘅最大受益人。
不過，霍恩夫婦離婚後，霍恩至今仍係CIFF嘅受託人，據知情者透露，佢可能自願繼續支持CIFF。事實上，佢前妻早年曾表示，霍恩熱衷於捐獻，二人均相信有些東西比個人更重要。
