政壇：發牌風波馬逢國破財擋災
香港電視網絡主席王維基日前宣布透過司法覆核，挑戰政府拒絕交代免費電視牌照嘅原因。立法會體育、演藝、文化及出版界議員馬逢國，原先都講過會向法院提出司法覆核，但係佢尋日就以王維基已經提出申請為由，決定唔再就事件提出司法覆核。
設計圖片及對白
投棄權票 遭業界聲討
雖然馬逢國未正式入稟，但佢就因為一早搵咗律師團擬定入稟狀，而要付出足足有成六位數字嘅律師費。不過，睇番馬逢國早前因為呢件事而被業界窮追猛打，呢筆錢咪當係破財擋災囉！
早前立法會討論引用《立法會（權力及特權）條例》徹查發牌風波，馬逢國因為投下棄權票而被業界狠批，話佢唔肯幫業界發聲，有人仲發起「一人一電郵」活動，要求馬逢國辭職。馬逢國之後決定以個人名義申請司法覆核，又定出如果王維基喺限期前唔作出申請，佢就會代王維基提出。不過，隨着王維基日前提出司法覆核申請，佢尋日同律師商討後決定放棄提出申請。
雖然馬逢國放棄司法覆核，但唔代表成件事可以告一段落，事關佢幾個月來搵咗唔少律師提供法律意見，加加埋埋都唔少錢。佢話律師團隊已經一切準備就緒，等佢一聲令下就可以正式向法庭提出申請。雖然佢暫時仲未收到律師開畀佢嘅帳單，仲未知要畀幾多錢，但六位數字都走唔甩喇！
佢又話，雖然要畀咁多錢有啲肉痛，但既然如今成件事終於可以擺上法庭查個水落石出，總算令佢鬆一口氣。其實馬逢國使錢當破財擋災，肉痛少少都無所謂啦！
