傷者氣憤：不如叫佢老細買咗條街
【本報訊】「有錢人好巴閉呀！大晒咩！不如叫佢老細買咗條街，咁佢咪可以點泊都得囉！」疑被林建岳座駕倒車撞傷的泥頭車司機王先生，昨在醫院受訪時直言在事件中最令他氣憤的是房車司機的態度，一句：「要搵呢架車撞你，你執到啦！」尤其刺耳，有恃勢凌人的感覺，他不諱言：「唔應該咁講嘢，你老細係名人，就更加應該態度好啲，低調啲呀嘛！」
受傷的泥頭車司機不滿房車司機的態度。
王與妻子育有現年分別讀小四及小二的兒子，一家四口居住鰂魚涌，他從事運輸工作已十多年，現時在搬運公司工作，主要負責駕駛泥頭車將建築泥頭運往堆填區，月入約萬多元，但收入不定。事發後，他被送院治療，在急症室等了多個小時，看醫生取藥後已是下午五時許，少了一日收入，他坦言：「佢哋有錢就冇所謂，我哋呢啲打工嘅，邊有咁多錢同佢哋玩！」
佢態度好啲未必搞成咁
他續稱，當時他與工友到娛樂行附近清泥頭，據附近公司職員說，該房車經常停泊在上址，但他則是第一次撞見。王稱，做運輸業少不免因交通問題與人起爭執，但今次卻首度被辱罵。事發時他不知道該車是林建岳座駕，只知是有錢人的車。他說：「如果佢態度好啲，件事可能未至於搞成咁！」本報曾就事件致電鍾詢問事件，他反問：「你邊度o架？」其後得知是記者，立即掛線，繼而將電話飛線往傳呼台。
