一早返公司，肥豪同膠蘇就好似輸晒成副身家咁樣望住少膽虫，啋！真係有財神都畀呢班蛋散趕走呀！當少膽虫諗住幫佢哋「開年」之際，膠蘇搶先一步：「腦腫你唔喺度，我哋真係唔知點算好！」你哋終於知道少膽虫重要喇咩？「唔使驚，少膽虫最識幫下屬解決問題嘅！」見到有人咁需要自己，少膽虫一於借機扮吓腦細過癮。「今日黎黎一返到嚟，就鎖自己喺間房喪笑……」膠蘇指住淫賤黎間房，煞有介事咁講。

少膽虫以九秒九嘅速度衝入淫賤黎間房，見到佢拎住份報紙，笑到聲都沙晒，「腦細，有咩咁好笑呀？」淫賤黎見到少膽虫，即刻指住手上份日月邪報：「你睇吓，人哋冇晒公信力喇！今次《爛果》仲唔上位？哈哈！」見淫賤黎就嚟笑到斷氣，少膽虫決定抑止佢快樂嘅情緒，「我哋監生屈憤強歧視新移民，又日日作古仔，都唔係行開公信力路線啦！」淫賤黎聽到之後，塊面即刻轉紅為黑，得咗！

第一手消息請下載on.cc東網iPhone/iPad/Android Apps