SUN奇古怪：SUN潮語：【吹神】

一到年尾年頭，又係樂壇各大頒獎禮嘅日子。以前呢啲由主流電台電視台搞嘅乜乜頒獎畀面派對，被稱為派成績表，即係一個歌手一年下來嘅結算，受歡迎程度同拎幾多個獎嘅數目掛鈎。請注意，係受歡迎程度而唔係音樂歌藝水準嘅高低。所以，每年有好多唱歌五音不全嘅藝人，一樣可以有音樂獎落袋。今時今日啲甚麼音樂頒獎禮，只係反映唱片公司同傳媒機構嘅政治協商結果，莫講話藝術成分，就連音樂成分都好低，亦不盡反映一眾歌手及音樂人背後的努力。成件事講得好聽啲係show，難聽啲就只不過係一場純商業嘅利益輸送會。最近，歌手陳奕迅喺一次頒獎禮上表現失準，被傳媒追問時又被稱態度囂張。佢嘅言論即刻喺網上被鬧爆。

同佢一齊工作過嘅人就知，陳奕迅「吹神」呢個名號係當之無愧。後來，「吹神」唔止係陳奕迅專有，但凡有啲友吹水唔抹嘴嘅都會被稱為「吹神」，不過同陳奕迅唔同，普通人被人話係「吹神」都係帶一點貶義，即係吹水太多。

不過以事論事，「吹神」陳奕迅係香港樂壇其中一個極出色嘅歌手，佢亦相當努力，敢於突破自己，每隻碟無論音樂水平、歌詞同演繹都維持喺極高水平，加上佢對自己要求嚴格，壓力咁大唔係人人承受得到。畢竟巨星都係個人，上台偶爾失準，唔開心講一兩句晦氣說話，點解唔可以包容？畀我揀，我寧願包容陳奕迅，都唔會包容為香港零付出但又嚟搵着數攞援助嗰啲人。因為，我們都是聽陳奕迅長大的。