政壇：搞搞政：泛民撳實荷包唔撐變相公投
學民思潮近日力倡五區議員辭職製造公投，仲要求泛民各黨派每區派出一個立法會議員辭職，再以「直接提名無篩選」作為補選議題，以測試市民對公民提名嘅支持度。「公民提名」一直被批評為《基本法》以外嘅「僭建」物，根本毋須討論，而且當年公投輸家遍地，所以家吓泛民黨派都不敢輕舉妄動，工黨議員更表明唔想冇咗筆約滿酬金拒絕，該黨議員包括何秀蘭等人，今次老實直接還招，足證荷包係好重要嘅。
設計圖片及對白
喺立法會內各佔六席嘅民主黨同公民黨就話要諗諗先至決定，擺明拖字訣！工黨就好坦白，話到明唔想冇咗筆議員約滿酬金，所以唔會辭職搞變相公投。要知道立法會議員可喺任期屆滿時獲得相等於任內酬金嘅百分之十五，計落足足有成六十多萬元。上屆搞五區公投嘅議員雖然再返議會，但約滿酬金就被取消，有窮議員好肉赤。
工黨中人透露，呢筆約滿酬金係議員競選新一屆立法會選舉資金嘅主要來源，如果因為中途辭職而冇咗筆約滿酬金，下次選舉分分鐘會因為唔夠錢而冇得參選。
