政壇：CY睇黃梅調憶雙親
特首梁振英（CY）尋日發表網誌，透露前晚趁凌波同胡錦喺新光戲院合作演出「梁祝黃梅調經典五十年演唱會」，專誠帶埋太太同兩個女兒去欣賞，之後仲感慨萬千咁憶當年。CY透露，自細已同父母去屋企附近、位於西邊街嘅真光戲院睇戲，當年佢仲未識聽國語片對白，父母為咗氹佢一齊睇，入場前會買條蠶蟲畀佢玩，而佢父母當年最鍾意睇嘅就係黃梅調電影。
梁振英（左二）一家上台同凌波（左一）、胡錦（右一）謝幕。（互聯網）
前年CY從報道得知凌波同胡錦喺台灣演出黃梅調「梁祝」，已諗如果父母在生，一定會買張機票，帶兩老去台灣睇凌波嘅演出。新光戲院負責人透露，當晚CY一家同其他觀眾一齊入場，冇行特別通道，但咁樣反而引起一陣騷動，唔少戲迷都爭相同CY合照，而CY就趁中場入後台探班，仲應要求喺演唱會完結時，上台同凌波、胡錦一齊謝幕添！
