今屆立法會雖然啱啱開始第二個立法年度工作,但政界早已開始部署下一屆立法會選舉嘅安排,新民黨主席葉劉淑儀去年底喺沙田政團公民力量(公記)周年會慶上現身後,雙方嘅動向就引嚟唔少猜測,最近更有傳話佢哋會搞合併,新民黨要壯大,就需要全港布局、搵啲有實力嘅地區政治勢力。有消息話,今次係西環出手撮合新民黨同公記,奈何公記做開沙田「山寨王」,冇咁易妥協,有心發展黨務嘅葉劉睇怕要食檸檬嘞。

設計圖片

曾傳同自由黨合併

據聞公記內部對合併仍存在好大分歧,大部分成員都覺得公記應該發展,但唔應該放棄自己個名,因為佢哋喺沙田就有樁腳、有實力,唔應該為咗少少資源而放棄一切喎,希望繼續保持合作關係。咁講係咪新民黨一廂情願呢?事關之前都傳過新民黨計劃同自由黨合併,所以新民黨嘅主動同機動都似有迹可尋咁。

不過,當年同自由黨嘅合併變成煲無米粥,依家同公記又有乜障礙呢?據悉,新民黨內高層的確希望擴闊新界東嘅版圖,咁先可以令身兼新民黨副主席嘅現任新界西立法會議員田北辰,有足夠信心轉戰超級區議會,並讓其他後起之秀代為出選新界西,而新民黨亦邁向布局全港嘅政黨之路。

至於另一講法,就係新民黨高層有意力捧上屆代表公記出選立法會選舉嘅沙田區議員龐愛蘭,所以只要公記肯加盟,有佢哋嘅樁腳,加埋該黨嘅名聲,嚟緊選舉可謂實食無黐牙喇。不過,呢頭親事成唔成,現階段都好難講,畢竟公民力量內部分歧未消。

第一手消息請下載on.cc東網iPhone/iPad/Android Apps