爆喉浸壞電梯 公屋管理水皮
公屋質素差劣，危機四伏，唔係天花鬆脫就係石屎剝落，唔係鋁窗墮街就係高空擲物，居民想出入平安，遲早要戴頭盔出街都似。唔係危言聳聽o架，除咗要戴頭盔，仲隨時要帶拐杖添，否則萬一爆水管搞到電梯跪低，又點可以撐幾十層樓返屋企吖！
嗱，咪以為太一叮講笑呀，咁荒謬嘅事真係發生咗。秀茂坪邨秀雅樓三樓尋日凌晨爆鹹水管，逝水無聲，無人發覺，水流一直沿走廊湧落電梯大堂，繼而流入電梯槽，搞到六部電梯齊齊短路，齊齊跪低。四十層樓共八百戶居民一覺醒來，至知水浸電梯，被迫撐樓梯上落，有人撐到氣羅氣喘，有人撐到裙拉褲甩，有人撐到滿肚怒火。最陰功係住喺高層嘅長者，本報記者現場所見，有老人家焗住撐足三十層樓，簡直攞命。
更攞命嘅係，爆水管癱瘓電梯本來已經夠兒戲，點知管理公司居然冇妥善補鑊方案，只係派出清潔工同管理員充當人肉抽水機，爬入電梯槽用水桶運走積水，唔知嘅話，仲以為睇緊粵語殘片，香港回到幾十年前，難怪居民怒斥房署延誤搶修進度，區議員更直斥房署方法落後。
正如有人話齋，今時今日，咁嘅管理點得o架。冇人巡樓咩？冇人定期檢查水管咩？冇人統籌搶修咩？只係爆水管咁小事，已經搞到七國咁亂，一發不可收拾，萬一發生火警咪死得人多？大家話喇，公屋管理甩甩漏漏，危機處處，市民點可能安居樂業吖。話時話，如果呢單水浸電梯鬧劇早幾日發生，元旦遊行隨時又多一批人上街！
講開又講吖，公屋管理不善，房屋署累街坊都唔係新聞咯。就講備受詬病嘅公屋晾衫竹吖，呢種人稱「三支香」嘅落後晾衫設施形同殺人陷阱，多年嚟不斷有居民因晾衫失足墮樓而亡，但係房屋署居然闊佬懶理，關人個關，直到最近又搞出人命，先至肯津貼居民更換，你話房署官僚係咪唔死人唔做嘢吖？
最搞笑嘅係，公屋唔止爆鹹水管，輪候冊一樣摻水。審計署早前踢爆，三成公屋申請人輪候時間超過三年，百分之七更加輪候逾五年，證明房屋署所謂「三年上樓」嘅承諾得個噏字，根本吹水唔抹嘴。
俗語話，人望高處，水向低流。睇嚟房屋署嘅管理水平似足爆喉鹹水一樣，低處未算低，既然係咁，署長栢志高不如改名叫栢志低喇，叮！
