SUN搞作：少膽虫手記：遊行異靈
香港遊行不嬲興報大數，似足古代打仗，幾萬人就話八十萬大軍，三百幾人就話八百壯士，無非係打心理戰，虛張吓聲勢。今次情況更複雜，淫賤黎更加要動員少膽虫去遊行，雖然無蛇齋餅糉旅遊巴，但係為保住份工都要去。
行到一半，淫賤黎聽完個電話就突然話：「我要行開去廁所，你哋繼續行，唔使等我。」少膽虫啱啱先見佢去完，就話：「腦細你腎虧呀？使唔使叫你個舌針醫生針埋下面？」
「你咪理咁多，總之你跟住行啦！我走喇！」淫賤黎急急腳就走，少膽虫心入面琢磨佢話「我走喇！」覺得事有蹊蹺，絕對係借尿遁。諗吓諗吓，又聽遊行隊伍有人話：「阿婆又去咗邊呢？今次個頭已經恤無可恤啦！」擰頭一睇，原來係民主婆「異靈異靈」嘅人。
「喂！你哋事頭婆又唔見人呀？」少膽虫問佢哋。「係呀，佢問完有無的士去堆填區就走喇。」佢哋答話。
此刻少膽虫頓然大悟，想起左膠鼻祖馬克斯講過，有一個共產主義嘅幽靈喺歐洲徘徊，但係又有幾多人知，有兩個反中亂港嘅幽靈喺港式遊行入面徘徊？
