尋日見到深水埗區議員Vincent鄭泳舜,講起啲家長要幫仔女排隊報讀幼稚園時,就好感慨話自己個細仔早前都報過七間幼稚園,結果一間都唔收,焗住要做候補喎!其實小朋友得嗰幾歲人仔就要考學校,又真係幾陰功嘅,因為就算佢哋再聰明,臨場發揮得好唔好先係關鍵。而Vincent囝囝今次呢個例子,又再次話畀大家知,學校唔係報得多就得o架!

鄭泳舜兩公婆每日送三個囝囝返學要走勻三個區。(資料圖片)

Vincent話期間有人介紹一間學費五千多元嘅學校畀佢,但似乎學費太貴,所以最後都放棄。雖然佢囝囝最後都考到幼稚園,但佢就嘆晒氣話,每日同太太做湊仔公、湊仔婆,送三個囝囝返學就好似遊車河咁,皆因三個囝囝分別喺黃大仙、九龍城、深水埗讀書,所以依家只好寄望佢哋快啲大,入讀小學,再讀埋同一間學校囉!

第一手消息請下載on.cc東網iPhone/iPad/Android Apps