城中鏡：馬雲嫂自爆被呃做煮飯婆
阿里巴巴集團創辦人馬雲嘅創業故事，大家可能聽得多，但馬雲背後的女人——老婆張瑛，又點睇呢個科網巨人丈夫？
馬雲被太太張瑛笑指不是帥男人。（資料圖片）
原來張瑛係馬雲大學同學，佢哋一畢業就拉埋天窗。張瑛話：「馬雲不是帥男人，看中他是因為他能做很多帥男人做不了的事情。」不過正因為咁，婚後張瑛曾長時間生活喺惶恐之中。
鬼主意多多嘅馬雲拉埋原本做教師嘅老婆一齊辭職搞阿里巴巴，點知係「呃」老婆喺屋企做煮飯婆，提供有品質保證嘅伙食畀開會員工。而張瑛更爆料話佢哋屬於90後嘅囝囝當年曾因父母忙爆唔得閒理，搞到似足阿爸成個火柴人咁樣，十幾歲開始喺網吧打躉做宅男添！馬雲情急下叫張瑛即刻「陪太子讀書」，老婆當然唔忿氣：「名成利就就讓我回家做全職太太，他拿我當甚麼？一顆棋子﹗」
兩夫婦即刻對沉迷打機嘅囝囝出招。「廿四孝媽咪」張瑛唔止管接管送，仲親自下廚煮愛心餐，更加會送飯去學校畀囝囝。半年後，囝囝就由宅男變番陽光少年。雖然科網同行紛紛推網遊賺錢，但馬雲總係冇跟風，仲喺董事會話：「我不會在網絡遊戲上投資一分錢，我不想看到我嘅兒子沉迷在我做嘅遊戲裏面。」
