政府廣納人才加入作為政府智囊嘅策略發展委員會，最主要係想聽取各界意見，但原來過去一年，策發會內部立立亂，而且士氣麻麻。

設計圖片

過往策發會都安排喺星期六開會，諗住官員同策發會委員都會得閒啲，抽到時間開會。不過，有委員對此好不滿，一心諗住星期六、日可以放低公事，陪吓屋企人，但偏偏就要去開會，由朝開到中午先至散會，等於冇咗半日假期，而且仲係冇人工添！

其實班官員亦唔多配合，策發會每次開會都有特定議題，亦有相關政策官員到場解釋政策，但就甚少提交相關文件畀班委員細閱，搞到班委員次次開會都一頭霧水，唔知由邊度講起，但又怕意見同政策相違，惟有講埋啲「阿媽係女人」嘅建議，大家水過鴨背就算數。

冇文件喺手，惟有靠官員解釋，但聽聞某啲官員講嘢特別長氣，好似人稱「吳得掂」嘅教育局局長吳克儉就係最佳例子，據聞有次吳得掂就所屬政策發言，一講就十五分鐘，要由其他人向佢打眼色先停止發表「偉論」。有委員呻話手上冇文件，唔通用筆抄低官員講乜咩？唔少委員都覺得好冇癮，好多時搞到會議有成四分一人缺席。

據理解，策發會方面已從善如流，將會議改為周五召開，但政策局唔肯提交文件呢個問題仍未解決。睇嚟班問責官員要認真檢討問題所在，否則嚇走晒啲智囊，到時策發會就真係要改名做「吹水會」喇，係官員同自己吹水呀！

第一手消息請下載on.cc東網iPhone/iPad/Android Apps