政壇：接掌貿發局陳啟宗呼聲高
今年最少有三大重要公職「夠鐘」換人，包括機場管理局主席、貿易發展局主席同海洋公園主席，但最令政府頭痛嘅，就係貿發局主席嘅人選。
陳啟宗
為免引起軒然大波，政府喺舊年已延長現任主席蘇澤光任期多一年，但估計呢招今年冇得再用，否則就會遭人詬病「一年又一年」。雖然距離佢卸任仲有大半年時間，但到底邊個接掌貿發局已有不少傳聞。
有具分量嘅商界人士分析，貿發局主席呢個位唔止要熟悉本地商界，仲要有國際視野，觀乎現時有可能接棒嘅商界中人，仍然睇好恒隆集團主席陳啟宗，雖然佢出晒名係「梁粉」，但佢同歐美、日本等地商界有深厚聯繫，唔應該因為「梁粉」背景而對佢能力有所質疑，但佢願唔願意做又係另一回事。
