政壇：朱耀明被嘲「石頭爆出嚟o架」
前晚元旦遊行結束後，「佔領中環」行動發起人之一嘅「朱牧」朱耀明，喺遊行期間同班後生仔載歌載舞，認真老當益壯，原來佢今個月七十歲大壽，但佢尋日喺電台節目自爆可能唔係七十歲，因為佢連出世日子都係老作嘅。
朱牧下周擺七十歲壽宴，暫定二十四圍。（資料圖片）
原來朱牧係孤兒，佢話童年同嫲嫲喺內地生活，十四歲前嘅自己係點樣連一張相都冇，直至一九五四年來港申請身份證，當年俗稱「移民局」嘅入境事務部職員要求佢填報父母姓名，佢好自然就答冇，但被職員冷言冷言反問：「你石頭爆出嚟o架？」佢惟有幫「父母」改個名了結咗件事，但自此亦少咗個麻煩，冇人再問佢父母係邊個喇！
至於一月二十一日呢個出生日期，朱牧笑言其實都係隨意寫，仲話如果有得再揀，希望揀一月一日仲易記喎。至於朱牧餐壽宴，暫定擺二十四圍，收到嘅禮金全部會撥捐佔中。
