政壇：立會秘道開綠燈
喺舊年十一月初，立法會審議係咪引用《立法會（權力及特權）條例》索取審議免費電視牌照文件期間，立法會被大批香港電視網絡員工包圍，秘書處於是開放接連立法會同政府總部嘅「秘道」畀議員離開，惹來外界質疑議員唔肯面對公眾之餘，更令泛民主派同建制派為封閉秘道問題爆爭拗。
設計圖片
指有實際存在必要
我哋之前率先披露，秘書處有意為秘道訂立使用指引，但原來最終都係傾向愈寬鬆愈好，咁即係同以前一樣，可以隨時開放。
立會秘書長陳維安尋日話秘書處有責任確保議員同官員可以自由出入立會，所以秘道係有實際存在必要，又話定出來嘅原則應以方便議員同官員為大前提，只要有議員要求開放秘道，秘書處就會因應實際情況嘅緊急程度決定係咪開放。雖然佢多番強調唔會隨意開放秘道，但如果再次出現港視員工包圍立會嘅情況，佢應該都會毫不猶豫地打開秘道。
對於有人質疑使用秘道嘅議員係逃避面對公眾，陳維安認為立會所有嘢都係喺陽光底下，議員一言一行都要面對公眾監察。有關使用緊急通道嘅指引及原則，本月就會提交行政管理委員會討論。話時話，指引定得咁寬鬆，或多或少都係幫建制派開路，事關之前極力反對封閉秘道嘅都係建制派，咁即係幫佢哋開綠燈啫！
另外，立會下周三將會徵求議員同意，將議員喺立會開會時嘅片段同相片放上社交網站，又會新增手機應用程式，令公眾更容易知道立會開會內容，睇怕到時班議員都唔可以隨便偷懶喇！
