違規賓館燒後欄 旅遊之都真羞家
香港旅遊業又火燒後欄！賓館林立嘅北角五洲大廈遭祝融之禍，釀成「平遊」香港嘅外籍旅客大災難，有人被煙熏，有人浴血，有人嚇呆，有人命危，呢趟歷劫之旅咁驚險刺激，睇怕港式賓館又名「震」遐邇咯。
顧名思義，賓館係招待賓客嘅居停，理應安全舒適，令客人有賓至如歸之感。可惜現實唔係咁美好，官老爺監管賓館敷衍塞責，求求其其，係又發牌，唔係又發牌，搞到亂象叢生，危機四伏，想唔出事都難。嗱，今次出事嘅五洲大廈就係樣辦，公契明明寫住三樓或以上不得作賓館用途，當局居然話之你，對牌照申請有求必應，小小一幢舊式大廈包含五間持牌賓館，劏房林立，人口稠密，逃生無門，住客冇變沙甸魚串燒都算萬幸咯。
沒有最兇險，只有更兇險。如果大家認為持牌賓館攻陷舊廈危機處處，咁太一叮不得不踢爆一個更恐怖嘅事實，就係香港嘅無牌賓館仲多仲得人驚呀！
以今次出事嘅五洲大廈為例吖，就有一間咁樣嘅隱形賓館，樓下水牌列明係賓館，樓上賓館居然掛住貿易公司招牌，分明就係掛羊頭賣狗肉啦。原來，呢間隱形賓館已經被列為無牌，但仍然透過網上招攬生意，不慎中招嘅旅客不計其數。
究竟港產官僚點做嘢o架？一係眯埋眼亂發牌，一係對無牌賓館打擊不力，咁即係靠害啫。須知道，現時全港有牌賓館大約一千三百間，而消防漏洞更多、意外風險更高嘅無牌賓館更加不勝其數，港產官僚隻眼開隻眼閉，等如自製炸彈，難怪事故頻生。當年尖沙咀一間無牌賓館火警，釀成一死多傷，當局信誓旦旦話加強掃蕩，事實證明根本係吹水唔抹嘴。
講開又講，違規賓館亂象叢生，其實就係本港旅遊業嘅縮影。前朝曾蔭權政府志大才疏，眼高手低，只識追求遊客增長，唔識完善旅遊配套，搞到酒店房間長期供不應求，不法賓館咪有機可乘，應運而生囉。貪曾唔止留低大量施政地雷，仲留低一堆違規賓館炸彈，認真好帶挈。
最好笑嘅係，早前官老爺回應議員時話喎，檢控無牌賓館個案已由一○年嘅三十八宗增至去年嘅一百二十八宗喎，相對多如繁星嘅無牌賓館，簡直係杯水車薪喇。咪話太一叮唔提醒，當局繼續得過且過，香港嘅旅遊業招牌可以當柴燒嘅嘞！
總之，違規賓館亂象生，炸彈不拆燒後欄。假金牛就話難識別啫，賓館有冇違規一查就知，當局唔好再偷懶嘞，坐視賓館危機，隨時玩火自焚嘅咋，叮！
