SUN搞作：打橫嚟講：年度風雲路姆西
每年年底，全球傳媒也會做個一年總結回顧，選出十大新聞，更有細緻地分類，例如：金融經濟、社會政治、民生文化、又或體育運動和藝壇娛樂的……甚至從而選出最具代表的「風雲××」。
綜觀今年香港最爆的三十件大新聞，全部無單好嘢，唔係死人冧樓海難槍傷無賠償，就係法治不彰、施政混亂、庸官無能、黑道囂張、經濟下滑……一言蔽之、民不聊生、民怨沸騰，暴風雨來臨前的低氣壓，只等待爆煲。
全年一眾大新聞內，對我而言，最有興趣討論的，是「路姆西」，嗱！我唔想再講政治，只放眼語文層面去研究研究。
一隻樣衰狼形毛公仔，英文名是Lufsig，唔知點解，大陸翻譯家會譯出「路姆西」之名，因用粵音或普通話唸讀，英文名字中的「f」，是「芙」音，而非「姆」；後來，因一「掉」出事後，將「姆」改「福」，此乃符合大陸普通話的讀法嘞！「福」的普通話讀近粵音的「苦」，正合「f」之原聲！但橫掂都改名，又唔知何故，只改「姆」，而唔掉走個「西」？「sig」之音譯，可以是「斯」或「絲」。若當日，示威者掉的，是「路姆斯」，那又怎會成為全城搶購、同埋衍生為「國際大新聞」呢？再者，如果唔係「路姆西」這譯名，全港報章又怎會用個「掉」字呢？點解唔用「掟」？又唔寫「擲」呢？
網友post的「路姆西」係用繩去「吊」佢的呀！
內地翻譯多純音譯便算，毫無美學可言，其實，Lufsig可譯作「魯夫斯」，像球星般型仔，咪多好！但最啱音又可愛的，應是「老夫子」，絕配！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
