城中鏡：郭炳聯加碼內地助學
新鴻基地產喺一○年起設立「新地集團員工子女本科獎學金」，資助基層員工子女修讀為期四年嘅全日制學士學位課程，新地主席兼董事總經理郭炳聯帶來喜訊，今年已將計劃擴展至內地員工子女。
郭炳聯（中）親自嘉許獎學金得主，寄語佢哋畢業後回饋社會。
據佢講，呢個計劃推出至今四年，合共已資助三十七名學生，今屆共有九名本港同四名內地員工子女獲獎學金。郭炳聯早幾日仲親自嘉許獎學金得主，佢寄語獲獎學生畢業後回饋社會。佢又同班學生分享成功之道，鼓勵年輕人要勇於承擔責任，積極面對困難，千祈唔好輕易言敗。
要攞獎學金都唔易o架，獲獎者係由評審委員會根據多項準則，包括學生家庭財務狀況、公開試及校內成績等甄選。其中一名獲獎學生羅啟聰，佢嘅媽媽喺新地任清潔工，大學學費是巨大嘅負擔，相信呢筆獎學金可減輕唔少壓力，佢話會修讀護理系，希望他日能夠喺急症室或手術室工作，第一時間拯救同幫助傷患。喺新地任職司機嘅余漢光一門雙傑，兩名女兒先後獲新地獎學金升讀大學。
