東網電視
更多新聞短片為幫助病童夢想成真，童裝品牌老闆Elaine張燕玲同老公Joey湯日昇尋日出動四千零四十四隻雪白毛絨熊，一隻跟一隻排出最長熊仔陣，成功圍繞尖沙咀一間高級酒店一百零二層餐廳一個圈，場面壯觀，同時亦創造最長泰迪熊行列嘅健力士世界紀錄。
張燕玲（左）同老公湯日昇攜手排出世界最長泰迪熊陣。
王嘉恩（右）同太太Pauline興奮上前摟住熊仔合照。
廖創興家族新抱廖周瑋瑩都嚟捧場。
Elaine晨早九點鐘就拉隊進駐餐廳，由牆角開始排陣，為免熊仔因太可愛遭人「擄走」，工作人員需逐一用針線將熊身連起，要一口氣縫接逾四千隻熊，都咪話唔辛苦，佢老公Joey都縫埋一份，認真唔話得。話晒創世界紀錄，唔可以馬虎，健力士世界紀錄的官方裁審員都親臨做見證，逐隻數過先頒發認證書，並宣告一項世界紀錄正式誕生。
義賣後助病童圓夢
親手創紀錄，Elaine十足結婚咁開心，而成功破紀錄嘅熊仔將用作義賣，籌得善款會捐畀「願望成真基金」，幫助病童達成心願。活動咁有意義，城中多位名人紛紛撐場，家中收藏逾五百隻熊仔嘅中華國術（香港）總會會長王嘉恩，即場掏腰包狂掃多隻啤啤熊送贈好友，愛心爆棚。
著名珠寶設計師陳曼芝都對熊仔愛不釋手，佢直言童年家境清貧，想擁有一隻熊仔都難，長大後圓夢成為設計師，不時將趣致熊仔造型加入設計中，逗人開心。
第一手消息請下載on.cc東網
