各政黨嘅支持度走勢如何？香港研究協會喺十二月訪問咗約一千名市民，結果顯示建制派政團得分大跌，令頭五名位置拱手讓畀泛民主派政黨，而排第六位竟然係近期經常同政府對着幹嘅富貴黨，似乎該黨唔止路線愈走愈泛民，連支持度都同泛民都好相似，難怪有消息話中央打算對該黨「最後規勸、最後機會」，否則或受到懲罰。

設計圖片及對白

屬於建制派嘅工聯會、建仔同新民黨嘅支持度都插水式下挫，好彩佢哋仍徘徊喺中游位置，而得分最低就係由上次嘅尾二跌到榜末嘅經民聯。究竟因乜嘢事令經民聯排名跌到落谷底呢？最大可能係打擊炒樓嘅「雙辣招事件」。

經過買家印花稅（BSD）打擊下，呢幾個月嘅樓市已經無升溫迹象，部分二手樓已劈價求售，樓價跌對小市民嚟講應該係好事，但經民聯就喺立法會內要求政府撤銷辣招，仲話雙辣招會攪亂香港。呢啲講法似乎同小市民想法背道而馳，好可能亦係佢哋支持度愈來愈低嘅主因。

經民聯成日話自己支持者係中產群，唔喜歡民粹主義，今次民調正正摑佢哋一巴，因為有四成受訪者認為自己屬於中產階層，但經民聯都得分咁低，睇怕係佢哋未夠實力吸引中產支持。老實講，經民聯喺立法會內手握七票，議價能力唔低，但偏偏喺市民心目中，佢哋得分竟然排最尾，呢個世界有因必有果，包括梁君彥同林健鋒等領導層係時候反省吓點解得呢個「果」喇！

第一手消息請下載on.cc東網iPhone/iPad/Android Apps