政壇：蔣麗芸送走菲傭回鄉退休
馬尼拉人質事件未解決，有政黨日前向立法會要求限制輸入菲傭以制裁菲國，立法會議員Ann蔣麗芸竟然趁呢期風頭火勢，自爆計劃送走屋企嘅菲傭返鄉下，唔通佢都難忍菲方處事方法，要怒炒菲傭洩憤？非也，佢透露要返鄉下嗰位菲傭已跟隨蔣家三十年，只係比自己大一歲，係時候回鄉安享晚年喎！咦？咁阿Ann明年咪可以退休？
蔣麗芸
自阿Ann加拿大留學回港後，多年來一直食呢位菲傭煮嘅飯，佢大讚呢位老臣子煮嘢好好食，早年仲保送菲傭去廚藝中心學嘢，所以自己結婚多年都無懼成為「無飯主婦」。菲傭臨別在即，阿Ann話已畀咗筆錢菲傭回鄉買地起屋，菲傭亦搵咗自己嘅姨甥女接班，確保晚晚煮出啱晒蔣家胃口嘅菜式。
少咗個老臣子或會影響屋企份餐單，需唔需要請多個菲傭幫手？阿Ann豪氣咁話：「唔好問我有幾多工人，幾多司機，只可以話你知我有一個老公。」明白，身為蔣家二小姐，屋企有數唔晒嘅工人同司機係不言而喻喇！
