我哋早兩日報道過民政事務局局長曾德成會聯同全港十八區議會正、副主席喺下個月九至十二日訪京，論資歷會由身兼新界鄉議局主席嘅屯門區議會主席劉皇發擔任今次訪京團團長。不過，我哋問過發叔，但佢就話未決定係咪上京，要過多兩日睇下天氣先再作決定喎！因乜事咁扭擰，究竟發叔係唔稀罕做呢個團長，抑或想睇下北京嘅政治氣候適唔適合告御狀先決定呢？

設計圖片及對白

今次十八區區議會正、副主席上京，清一色係建制派。據了解，佢哋應該至少都會獲國務院港澳辦主任王光亞級數嘅官員接見，甚至可能會同更高級嘅領導人會面添。不過，原來計劃擔任團長嘅發叔並未決定係咪上京，仲話要過多兩日睇下天氣點先，如果天寒地凍就唔遠行咁話。

團友積極準備

早排發叔因為政府將大浪西灣納入郊野公園範圍一事，聯同一班鄉紳與政府關係一度僵持，其實佢可以藉上京見領導人之時告御狀。但佢話今次係區議會上京，唔關事嘅，所以唔會講大浪西灣嘅嘢。唔通佢係因為知道冇機會打小報告，所以先對上京興趣大減？

發叔上唔上京就仲要睇天氣，但其他區議會嘅主席就已經諗緊同領導人表達乜嘢好。兼任上京團秘書長嘅元朗區議會主席梁志祥就話，區議會好關注特首選舉提名委員會嘅人數同組成，估計今次都走唔甩會傾政改。屯門區議會副主席梁健文就話希望代表喺內地工作嘅港人反映內地空氣污染同食物安全問題。北區區議會主席蘇西智就話要就民生議題向北京借鏡咁話喎。啲主席打算表達唔同嘅議題，咁大浪西灣問題係咪都算係民生議題嘅一種呢？

第一手消息請下載on.cc東網iPhone/iPad/Android Apps