紀律部隊不紀律 管理無能丟晒架
紀律部隊責任重大，唔係除暴安良就係救急扶危，唔係維持治安就係救火救人，所以必須紀律嚴明，緊守崗位。既然係咁，紀律部隊可唔可以隨便「集體請假」，擅離職守呢？答案梗係唔得喇，但偏偏紀律部隊感染「集體請假」病毒，經常變相罷工，簡直視紀律如無物。
嗱，海關就係「冇紀律部隊」一號。有駐守機場嘅海關前線人員懷疑因為不滿新管理層不恤下情，人手緊絀依然增加前線工作量，於是喺本月十五日集體請假，宣示不滿。有人仲揚言，如果管理層漠視訴求，不排除喺元旦等節日出入境高峰期再發起行動添，萬一事件影響旅客過關，搞到機場大擠塞，呢個元旦唔慌唔普天同「慶」咯。
「冇紀律部隊」二號係消防處。唔知係消防處前線員工特別火爆，定係管理層特別惹火，消防處控制組喺十二月亦有六名前線人員疑因不滿上級管理失當，不堪工作過量，又係集體請病假示威，搞到接聽九九九電話嘅人手頓失三分之一。
仲有喎，深圳灣口岸人員喺十月底又係疑因不滿工作繁重集體請假，結果導致當晚口岸擠塞，民怨載道。
喂，紀律部隊肩負重責，點能夠郁啲就集體告假，郁吓就擅離職守o架？海關駐守關人個關，消防運作火燒後欄，出入境口岸無掩雞籠，咁搞法，香港容乜易天下大亂o架？三件事影響不同，但脈絡一致，都係矛頭直指前線人手不足，都係以「一不做，二畢休」嘅方式抗爭，而結果都係禍及無辜市民。一句講晒，就係管理層無能，害人害物！
「東方報業民意調查」顯示，紀律部隊紀律廢弛，四成三受訪者斥反映部門管理不善，亂象叢生；三成六批評係當局迴避人手短缺問題嘅惡果；一成八擔心問題一觸即發，形成惡性循環，甚至蔓延至其他部門。
其實，紀律部隊不紀律，何止「集體請假」吖。呢，消防處早前爆出前線人員集體秘撈醜聞，其中五人喺五月被解僱，其餘二十三人嘅紀律聆訊近日完成，據聞全部只係被「譴責」，同一罪行，處分不一，分明大細超。以上調查顯示，四成四受訪者直指紀律部隊紀律鬆懈，反映公務員管理漏洞百出；兩成八認為會損害公務員形象；兩成四擔心會為社會帶來不穩定。
講到呢度，大家知點解香港烏煙瘴氣，亂七八糟喇，紀律部隊連自己都管唔掂，點樣衞港安民呢？港府連屬下部門都管唔好，點樣管好香港呢？所謂福為民開，吹水就得，叮！
