SUN搞作：少膽虫手記：祈福黨殺到
少膽虫一返到公司自言自語：「祈福黨又出現喇……」好衰唔衰畀淫賤黎聽到晒，即大興問罪：「又有祈福黨？今次咩料？攞嚟做獨家新聞好喎！」少膽虫續說：「光天化日聯群結隊喺沙田中央公園出現……」淫賤黎追問：「咁佢哋今次用咩招數先？」「倒吊囉！倒吊喺樹上面！」「咩話？倒吊嚟呃人？邊有可能啊，哈哈哈哈！」淫賤黎捧腹大笑。「唉，弊在正義傳媒已經報道咗，我哋想做都唔夠快喇！」少膽虫戰戰兢兢道。
「啪！啪啪啪！」淫賤黎隨即掌少膽虫幾巴：「可怒也！點坐腦腫個位o架你！有新嘢都畀人搶先一步！請你返嚟托咩！」少膽虫語帶淚聲：「腦細，祈福黨啫……」「祈福黨專呃老弱婦孺，只要我哋報道到幾咁慘絕人寰、有幾誇得幾誇，啲讀者實啱睇，到時《爛果》咪又可以起死回生！依家連頭啖湯都無埋……」淫賤黎突怒火中燒。
少膽虫不思費解「乜祈福都可以報道到咁慘o架咩」，於是澄清：「腦細，係『奇蝠黨』，唔係祈福黨……」少膽虫話都未講完，淫賤黎已經閂埋房門，睇嚟少膽虫今次的八月十五又不保嘞！
