城中鏡：葉澍堃跟過梁錦松保釣
民政事務局局長曾德成喺六七暴動期間派發反政府單張而被判囚兩年，其實唔只曾德成，前高官Stephen葉澍堃都曾經度過一個火紅嘅學生年代。Stephen尋日接受電台訪問時，自爆讀港大時曾響應後來做咗財爺嘅「阿松」梁錦松號召參加遊行，聲援內地嘅保衞釣魚島行動。
離開官場後，葉澍堃同太太經常去旅行同積極參與慈善活動。（資料圖片）
Stephen憶述，當年阿松打算喺校內發起示威運動，仲代表其他熱血學生帶頭向陳君堯老師申請休學一日搞示威，最後老師批准休學，阿松就帶埋佢哋一眾好友去校內荷花池籌備示威行動。佢仲話阿松喺大學年代已經係校內嘅活躍分子，當時仲去過海上學府遊學，同其他學生淨係識得匿埋喺圖書館讀書好唔同。
Stephen退休前做經濟發展及勞工局局長，當中有唔少難忘回憶，例如○三年沙士爆發後，市面一片蕭條，佢就頻頻落區「做騷」，同政黨唱卡拉OK之餘，仲搭飛機喺香港上空盤旋，希望可以鼓勵市民多啲消費。
