城中鏡：榮智健范鴻齡各自精彩
年前因公司爆出炒燶Accumulator導致虧損嚴重嘅中信泰富前主席榮智健，沉寂多時後，尋日突然現身沙田馬場，捧吓新愛駒「飛影」場。佢入場後一個箭步走入馬會董事廂房，偶爾行出廂房露台觀賞賽事，睇嚟心情唔錯。與榮少同場現身嘅，仲有同樣捲入醜聞嘅中信泰富前董事總經理、前行政會議成員Henry范鴻齡，兩人同台睇馬卻未有交頭接耳，而係分隔幾十米，喺露台各有各睇，但榮少回應我哋嘅問題時就話同Henry仍有聯絡，可見賓主情誼仍在。
榮智健（左）突然現身為愛駒「飛影」首次出戰打氣，馬會前大董李國棟陪伴左右。
久違了嘅范鴻齡（右）同太太並肩入場，兩人有講有笑，神情輕鬆。
榮少日前啱啱夥拍太古地產等組成財團斥資三十多億元，收購中信泰富持有嘅港島東大昌行商業中心全幢物業，成為市場焦點，如今高調亮相，莫非想宣布東山再起？榮少聽見，笑騎騎話唔會：「我哋以休息為主！」賞馬本來係最佳休息嗜好，可惜愛駒「飛影」第一次出戰，臨入閘前將騎師拋跌，被迫退出賽事。出師不利，睇嚟榮少仍然「黑仔」喎!
