呢排「假金牛」愈揭愈多，全城恐慌。有零售商早已拒「金牛」於門外，海皇粥店執行董事蕭楚基話已吩咐全線員工戒備，一旦收到第一張假鈔，就會馬上貼出通告，即時全線拒收「金牛」。

餐廳股東之一羅德榮（左）話客人愛碌卡數，唔怕有假鈔。旁為馬主李應彪。

蕭楚基：加強執法

黃士心：置驗鈔機

何惠雄：提醒員工

錢銀找贖，對於旗下擁有二十多間粥店嘅蕭楚基嚟講係一件頭痛事。佢坦言每日都收到唔少「金牛」，眼見假鈔湧現，甚至瞞過驗鈔機，愈諗愈擔心，已叮囑員工收錢時切勿貪快，驗清楚先收。佢又笑言，「假人仔」做工差劣，一睇就知係假嘢，反而「假金牛」偽冒技術高，中招都未必知，呼籲政府加強執法，杜絕假鈔流出市面。

客人多碌卡 羅德榮未驚過

假銀紙防不勝防，康泰旅行社董事長黃士心都曾中招。佢憶述十多年前，其中一間旅行社分行的職員收到十多張「假金牛」，有人戲言拎去使咗佢，黃老闆心知行使假鈔係犯法行為，堅拒咁做：「當年萬幾蚊幾多o架啦，幸好以前搵錢易好多，惟有當自己當黑囉。」經此一役，佢馬上制訂一套防偽錦囊，又添置多部驗鈔機，自此再無收過假鈔嘞！

彩福婚宴集團創辦人及行政總裁何惠雄都收過假鈔，面額無一千蚊咁勁，而係一百蚊紙，佢坦言打開門口做生意，拒收「金牛」往往令客人無癮，只好提醒櫃位員工多做功課，緊記假鈔特徵。

市面人人聞牛色變，中環SEVVA餐廳股東之一嘅羅德榮就話未驚過：「嚟幫襯嘅貴客多數碌卡，好少畀金牛，所以唔使驚。」

第一手消息請下載on.cc東網iPhone/iPad/Android Apps