政壇：搞搞政：話學者撐唔派糖鬍鬚曾唔怕面懵

鬍鬚曾尋日更新網誌，透露早前趁預算案諮詢會同長遠財政計劃工作小組兩位學者見面，引述二人話深入了解過香港嘅人口老化速度同經濟數據後，都不約而同對香港財政感到憂慮，提醒鬍鬚曾要提早下功夫，特別係調節一下公眾對香港公共財政嘅理解同預期，實際意思真係可圈可點。鬍鬚曾仲話呢番話「肯定了我近年的想法」，大條道理攬住七千幾億元財政儲備唔放。

警告有一天要發債加稅

佢又喺網誌度話，隨着香港經濟增長放緩，勞動人口比例下降導致收入減少，與此同時老年人口增加，各項屬基本福利嘅經常開支只會有增無減，要設限亦唔容易，警告終有一日，政府需要動用財政儲備去支持公共開支，又警告儲備總有用完嘅一日，政府到時一定要增加收入，例如加稅或發債來維持收支平衡。點知佢又即時補鑊話，相信呢啲情況唔會短時間內出現，但「總有一天會來臨」，有需要話畀公眾知問題嘅嚴重性。

換句話講，即係恐嚇港人總有一日會冇飯開，但呢一刻短時間內唔會出現，「又要威又要帶頭盔」咪呢啲囉。