政壇：家是香港收爐林鄭讚花香

日前有消息話為期八個月嘅「家是香港」運動即將結束，政務司司長林鄭月娥就趁「收爐」前，透過政府新聞處出稿賣花讚花香，佢首先話「家是香港」充分反映市民對慈善精神同弱勢社群嘅關愛，其後新聞稿就列舉數據，包括運動專題網站錄得一千八百萬人次點擊同一百二十二萬頁面瀏覽人次，又話兩名歌手主唱嘅主題曲《同舟之情》大受歡迎，不過林鄭失驚無神落力讚好「家是香港」，講到尾都係為咗本月三十一日晚上，煙花同煙火匯演呢個壓軸活動「造勢」。將人哋嘅活動全部收納起嚟當係自己嘅活動，點算起嚟當然多啦，啲花真係無辦法唔香喇！