政壇：波波曾德成避爭議課題
發展局局長「波波」陳茂波同民政事務局局長曾德成都係「鍵盤戰士」，尋日例牌發表每周網誌，但就齊齊避談近期爭議課題，包括大浪西灣西灣村「封村」事件，同埋屯門體育會被指喺港甲賽事中打假波事件。
陳茂波
曾德成
波波喺網誌中大談近期「零爭議」嘅歷史建築及文物保育，話今年初施政報告提出要檢討保育私人歷史建築政策，古諮會正在反覆設計諮詢文件嘅內容，希望明年初推出嘅諮詢文件可以做到深入淺出，方便市民就未來文物保育路向提出意見。
位處將軍澳嘅單車館將於今日舉行竣工儀式，德成局長就喺網誌中話，單車館係繼維多利亞公園新泳池後，本港另一個符合舉辦國際標準賽事嘅體育設施。佢話單車館有助推動單車運動長遠發展，進一步提高香港喺國際單車運動嘅地位，又引述香港單車代表隊總教練沈金康話，希望新場地有助培訓新一代港隊接班人，甚至訓練下一位世界冠軍。爭議課題唔講唔代表唔存在，亦唔代表已經解決咗，唔知兩位高官明唔明呢個道理呢？
