政壇：華裔英貴族唔認同「佔領」
「佔領中環」行動蠢蠢欲動，想喺後日嘅元旦遊行安排「瞓街」環節預演佔中，遠道來港嘅英國上議院華裔議員韋鳴恩勳爵（Lord Wei of Shoreditch）就話，與其「佔領」（occupy），其實有更實際、更值得探討嘅方法為年輕人消氣，道理簡單如「授人以牛」，不如教年輕人將隻牛變成自己嘅生財工具，好過捐錢畀佢。
港人韋鳴恩是英國史上第三位華人貴族。
港人對韋鳴恩比較陌生，但其實佢係居英港人，年僅三十六歲，係當地最年輕嘅上議院議員，更係史上第三位華人貴族，喺當地華人社會佔舉足輕重嘅地位。韋鳴恩面對眼前嘅年輕人，笑言三年前剛剛加入上議院，身邊唔少議員年紀係佢嘅兩倍，所以佢好明白作為「年輕人」嘅感受。
對於年輕人近年興起示威浪潮，韋鳴恩唔多認同透過「佔領」表達訴求，佢勉勵年輕人「後生」本身就係資產，又直接舉例話，英國年輕人可以透過擁有一部３Ｄ打印機，利用打印機生財，咁就唔使向政府伸大手板攞錢。不過，港人「佔領」係為爭取民主選舉，唔係吓吓為錢，比喻唔算好貼切。
