政壇：論政改提名單雞撐飯蓋
自從政改展開諮詢，基本法委員會主任、副主任或委員都逐一出嚟解畫，話普選特首一定要符合《基本法》規定，其中政黨提名同公民提名都可能偏離《基本法》。不過，白鴿黨或者唔想被泛民主派認為唔係朋友，該黨嘅立法會議員「單雞」單仲偕尋日仲繼續死撐，話公民提名同政黨提名方案有幾好，又話佢哋其實願意同北京商量，但如果提名過程有篩選，就一定得唔到立會三分二支持喎。其實，泛民各黨派提出咁多方案，又五時花六時變，不如圍內傾掂咗先啦！
設計圖片及對白
單雞尋日喺一個英文電台節目上講咗有關佢對政改嘅睇法，逐一剖析公民提名同政黨提名嘅好處。至於佢哋都話可接受嘅擴大提名委員會方案，佢就冇點樣提到喇。首先喺公民提名上，佢話雖然國務院港澳辦主任王光亞講過係偏離《基本法》，但佢哋相信根據《基本法》第二十五及第二十六條規定，港人有平等權利，且有被選舉權、提名權同投票權喎。至於政黨提名方面，佢就話呢個方法唔單止可推廣政黨政治嘅發展，仲可以令特首有更高政治能量，喺立法會得到足夠支持。如果香港要實行完全民主嘅普選，同埋有個公平、公開且有競爭嘅制度，就要推廣政黨政治。
揚言有篩選難過關
佢仲話，雖然白鴿黨會批評，但其實都願意同北京有建設性嘅接觸同協商，以及妥協出一個修訂嘅方案。不過，佢喺文章入面就疑似提出警告，如果提名過程涉及篩選嘅話，相信有關方案係唔會獲得立會通過喎！
其實，單雞只係喺度死雞撐飯蓋啫，事關依家講乜都係假，到咗方案提交立會，到咗數票嘅時候先至見真章。各方都估白鴿黨到時會歷史重演支持方案，大家放長雙眼睇吓點囉。
