前朝揮霍敗官風 今朝豈敢大花筒

呢，本報查詢發現，過去一年港府問責官員外訪開支比前朝大幅減少，花費最多嘅係財政司司長曾俊華，外訪十一次，總開支接近一百三十萬元；而外訪次數最多嘅係商務及經濟發展局局長蘇錦樑，總共廿一次，開支亦超過一百萬元。雖然數目唔算少，但亦唔算太離譜，大致上都可以接受嘅。正如有立法會議員話齋，今屆政府外訪情況不及前朝瘋狂，相信係因為特首梁振英提倡節儉，提醒官員小心謹慎，避免出現不必要嘅外訪開支。

即係咁，基於職務需要，港府高官外訪係無可厚非嘅，最緊要唔好奢侈，唔好浪費，唔好假公濟私，如果能夠公開交代外訪嘅目的及取得嘅成效，以釋除公眾疑慮，咁就更加理想喇。總而言之，為官者隨時都要記住「爾俸爾祿，民脂民膏」，花費公帑要依足規矩，應使則使，應慳則慳，千祈咪學嗰位其身不正嘅貪曾咁，貪威識食，亂揈公帑，搞到其他官員有樣學樣，個個唔執輸，人人大花筒，導致成個政府瀰漫歪風邪氣，腐敗不堪。

講起曾爵士嘅貪腐醜聞，真係火都嚟埋。佢在任期間「貪遍省港澳、歎盡海陸空」，除咗屢次接受富豪款待，喺超級遊艇吃喝玩樂，仲多次乘搭私人飛機，周遊列國添，正一有便宜貪到盡，有咁豪去到咁豪。審計署踢爆貪曾五年任期內總共外訪五十五次，花費公帑一千二百萬元，當中有四十一晚入住當地最豪華酒店嘅最頂級套房，包括喺巴西享受每晚超過五萬元嘅總統套房，真係唔到你唔服。

上樑不正下樑歪，貪曾手下學埋佢假公濟私嗰套，各自搵着數，政府淪為「曾氏貪腐樂園」，除咗涉貪被廉署起訴嘅前政務司司長許仕仁，仲有一手摧毀廉署金漆招牌嘅前廉政專員湯顯明，簡直係蛇鼠一窩。

腐敗不得民心，貪官人人喊打。家陣連內地當局都大力提倡節儉，唔只嚴禁官員公費大吃大喝，仲嚴格控制外訪，最近已開始收到成效。計太一叮話齋，香港要重振廉潔聲譽，港府要重拾市民信心，除咗嚴格監管公務開支，最重要嘅係整飭綱紀，依法處置貪曾及貪湯呢對「絕代雙貪」，叮！