SUN搞作：少膽虫手記：秘道
作為一個浪子，少膽虫今晚如常單拖收工，剛要行出壹全霉時，突然聽到一陣詭異嘅「咔、咔」聲。半夜三更有人鑿嘢咁離奇？少膽虫有名你叫，當然冇膽深究，即時行快兩步閃人。
「少……少贍虫……」唔係咁邪呀？「冤有頭債有主，啲假新聞全部係淫賤黎作，唔關我事o架！」正當少膽虫嚇到跪低，耳邊傳嚟一把好熟嘅聲︰「你亂噏啲乜呀？」少膽虫一睇，原來係一身地盤look嘅淫賤黎。「腦細你轉行呀？」淫賤黎踎低揭起地板塊磚，下面居然有條秘道，「轉你個頭！快啲嚟幫手。」少膽虫跟住腦細行落去，淫賤黎一路行一路講︰「早排我聽聞有走私客整咗條深港秘道，咪諗住鑿番條玩吓囉！」少膽虫忍唔住問︰「喺度鑿？有排都未鑿到深圳喎！」
「邊個話鑿返深圳？我諗住鑿過隔籬堆填區咋！」淫賤黎解畫︰「有咗呢條秘道，就可以將《爛果》偷偷地運去堆填區，到時賣剩幾多都無人知啦！你快啲過嚟幫手鑿，未鑿完唔使旨意收工！」
