SUN奇古怪：SUN潮語：【辦事人】
潮語所謂「辦事人」，或簡稱為「辦事」，係指最高領導人。「辦事人」可以管理一個社團、一間公司，甚至一個政府。「辦事人」呢個潮語，本來係社團術語，用嚟尊稱社團最高決策者。「辦事人」畀人一種謙卑嘅感覺，好似形容領導人默默為社團工作，日日辦事，喺兇險嘅江湖嚟講，有一種文質彬彬充滿魅力嘅「辦事」能力，比起叫「大佬」，有水平得多。
網上流傳一張領導到平民館子食包嘅圖片，表現非常之親民，亦都貫徹佢一向儉樸嘅形象。
唔知佢咁樣微服出巡，係咪同最近毛澤東一百二十歲冥壽有關？不過可以肯定嘅係，大陸今時今日經濟發達，但係人心不古，以致好多大陸民眾反而懷念毛主席當政時間，人人夜不閉戶，幹部清廉，全民克勤克儉嘅風氣。時代巨輪係無法子去擋，時光亦不會往回走。加上今時今日嘅領導人，所處身嘅時代已非昔日，不可同日而語，國情比以前都複雜好多。所以無論邊個做領導，都絕對唔係Easy Job。
要解決中國全國各種奇難雜症，仲要面對列強挑機，作為最高「辦事人」，唔係食個包咁簡單！
話雖如此，做「辦事人」又未必真係有辦事能力，睇戲同現實世界都知，選「辦事人」係一件相當險惡嘅事，有時選出嚟做「辦事」嘅人未必係最叻，只係嗰個人係唔會引起派系鬥爭，對整個組織有利而已。二○一七香港就要選「辦事」，到底到時又係邊個你爭我奪？我諗香港呢個局，要真普選先擺得平咯！
