政壇：搞搞政：中學生論政唔撐黃之鋒
政改諮詢中，由學生組成嘅學民思潮鼓吹「公民提名」特首候選人，即使有意見認為不符《基本法》，該組織同召集人黃之鋒都擺明一副半步都唔讓嘅姿態。不過尋日一班同為中學生嘅同學參加一項政論活動後，講到公民提名就唔撐佢哋，仲話現階段最重要係大家有得普選特首，公民提名太急進怕到時會出現混亂。
設計圖片及對白
香港小童群益會尋日舉行第六屆「香港小特首」發表《小小施政報告》發布會，呢個活動除咗有班小特首發表佢哋以「兒童友好城市」為主題嘅施政報告外，仲搵嚟政制及內地事務局副局長劉江華做主禮。劉江華致辭時話政改要喺唔同角度搵到共同目標，要有商有量咁推動。
咁呢班小特首又點睇普選特首同公民提名呢？讀緊中四嘅陳嫚堯話，二○一七年先係香港第一屆普選特首，似乎公民提名太過急進，擔心咁多人都有份提名，會出現混亂，建議先有普選。蘇景御就話，港人最擔心係有篩選嘅普選啫，所以最重要都係個提名委員會要有透明度。
