政壇：新同盟內訌白熱化
新民主同盟立法會議員范國威（Gary）有份嘅「香港本土」，早前為咗要求港府收番內地單程證審批權而大搞「源頭減人」聯署，除咗惹起歧視新移民爭議外，更搞到內訌，事關身兼新同盟召集人嘅沙田乙明邨區議員丘文俊參與咗泛民主派嘅反歧視聯署，同范國威分道而行，內部矛盾呈現，近日又添新事，據講早前丘文俊喺屋邨就房協加租搞抗議行動，但Gary就喺邨口派年曆，各有各做，好似陌路人咁，而新同盟內部一啲安排都可見不和痕迹，內訌已趨白熱化。
設計圖片
違一般政黨運作
早排房協宣布轄下公屋加租，丘文俊就喺受加租影響嘅乙明邨搞抗議行動，Gary作為新同盟嘅立法會議員，照計應該振臂同呼，點知佢不但冇迴避，反而喺邨口派自己嘅宣傳年曆，擺到明打對台咁。根據一般政黨運作，同一黨派地區樁腳有行動，該黨嘅立法會議員都會拍住上，今次新同盟各有各做，認真奇怪。
我哋就問過丘文俊有關當日Gary喺邨口派年曆一事，佢原來都被街坊問到口啞啞，仲話並唔知當日Gary會落區，而且佢哋已經好少接觸咁話。
丘文俊自參與泛民嘅反歧視聯署後，已同Gary起嫌隙，依家互不相干，甚至有人「小學雞」一般玩杯葛，裂痕真係愈來愈大。
丘文俊話，新同盟沙田份地區報已經唔會印佢嘅消息，而早前政府就沙田巴士路線問題同地區開會，立法會議員劉慧卿都有同佢哋嘅區議員一齊出席，但Gary就請都唔到，而佢託Gary代為約政府官員開會就更加係音信全無。我哋都有問番Gary究竟搞邊科，不過佢就話唔想評論喎。
其實除咗丘文俊同Gary嘅矛盾升級，Gary一個助理早前離職後亦喺社交網站暗批舊老闆Gary，睇嚟Gary都要自我反省吓喇。
