有人無瓦遮頭 有人濫用公屋

呢，截至十一月底，房署本年度共收到二千七百宗濫用公屋舉報，比過去兩年分別多咗約九百宗及五百宗。數字亦顯示，本年度自願遷出嘅公屋租戶有四千七百戶。有房委會委員係咁講嘅，舉報個案增加反映加強宣傳收到效果，居民嘅意識亦有所提升，但唔代表可以令收回嘅公屋單位大增喎。

特首年初喺施政報告提出加強取締濫用公屋，希望連同租戶自願遷出嘅單位，每年可以收回七千幾個。講就係咁講，可惜良好願望唔等於現實。雖然房署增加資源，成立特別小組處理相關工作，但由於個案太多，進度緩慢，收回單位寥寥可數，離七千個嘅目標仲有好大距離。

正如有人話齋，如果房屋署以為單靠打擊濫用公屋及租戶自願遷出就可以達標，似乎太過樂觀，估計最多只能收回五千個單位咋。所以呢，房署實在有必要加大力度，例如增加人手，甚至要求外判物業管理公司協助。

即係咁，舉報個案增加，除咗加強宣傳有一定效果，其實亦反映濫用情況愈來愈嚴重。好似公屋富戶佔用資源咁，現時租戶住滿十年以上至需要申報家庭入息，超出入息上限八十四倍至需要繳交市值租金及於一年內遷出，根本無辦法送走公屋富戶，而房署又經常以人手有限做擋箭牌，疏於抽查，濫用公屋問題有乜法子唔嚴重吖。

房署執法一向懶懶閒，就前幾個月之嘛，市民發現有人懷疑濫用公屋單位向房署舉報，連資料都提供埋，點知過咗一年都無下文，「一句交代都冇」。同樣離譜嘅係，有立法會議員年薪連津貼超過百萬，平時扮晒為民請命，居然長期霸住公屋單位，當局居然好似冇件事咁，問你服未。房署執法甩甩漏漏，有法不依，執法不嚴，咁搞法，再多公屋資源都唔夠浪費喇。唔怪得連審計報告都批評房屋署公屋政策不合時宜喇！

房屋問題愈來愈嚴重，公屋輪候冊突破二十三萬，輪候時間愈來愈長，三年上樓嘅承諾已經名存實亡。唔該房署官僚加強執法，如果連打擊濫用公屋都搞到唔湯唔水，解決房屋問題淪為大隻講，民怨隨時爆煲o架，叮！