SUN奇古怪：Sun潮語：「港喱」
「港喱」即係對其他地方嘅事，尤其係對中國嘅事相當無知嘅香港人。「港喱」欠缺國際視野，又不願學習新事物，思想長期浸淫喺各種娛樂活動而又不關心社會，故此對好多事物，變得無知而不自知。有啲對國情一無所知，又少去內地「學習」，以致去到大陸工作或玩嘅時候唔識規矩，慘被大陸人恥笑，呢啲港人都可以稱為「港喱」，就好似香港人以前取笑大鄉里出城嘅大陸人係「大陸喱」一樣。
幾十年前，每家每戶總有一兩三個內地窮親戚，三不五時就要匯錢上去。以前內地物資短缺，我哋父母嗰一代，將啲糧油、日用品一支擔挑就走過羅湖橋，運返內地。及後七十年代尾八十年代頭開始改革開放，好多香港家庭都接待過內地落嚟嘅親戚。
舊時香港人對內地來客，無論係旅客同新移民，一般都冠以帶貶義嘅稱呼，例如係阿燦、表叔、大陸仔、大陸喱等等。時移世易，香港人發夢都估唔到內地人有朝一日會發達到今日嘅地步，GDP位居全球第二位，港幣會cheap過人仔，全世界都要搶住賺內地人錢。今日嘅香港人，被昔日嘅內地同胞反過來譏諷為「港喱」，舊時風光，都只不過係「舊屎」。
最近喺網上睇咗一篇由「假啞港女」撰寫，題為「港孩的絕種，港喱的成長」嘅文章，裏面提到潮語「港喱」一詞，文中提及「老而不死是為賊，柒而不知是為喱」，大概都可以為港喱定義留下注腳。
「港喱」個「喱」字相信係同「咕喱」有關，因為以前「咕喱」英文Coolie係從事搬運工作嘅物流界人士，通常係低學識低技術嘅一群，佢哋相對見識較少同較為無知，所以香港叫人做「喱」，即係貶低對方。
香港到底有幾多「港喱」？當然無人知。不過香港確實有好多政商界人士，對中國歷史政治無知，而又盲目阿謏奉承內地大人，呢啲可以好肯定係「港喱」!
