暴風雨前通常特別平靜，少膽虫深明呢個道理。淫賤黎平時返到公司，第一件事就係捉少膽虫去照肺，但今日居然一返嚟就匿入房兼粒聲都冇，唔通籌備緊炒魷縮皮大計？

「少膽虫同我入嚟！」吓！難道要向我開刀？少膽虫懷住悲壯心情行入腦細房，點知一入去就聽到淫賤黎自言自語︰「輪廓咁分明，係咪真o架？但咁玲瓏浮凸，摸上手又唔似假吖……」原來匿喺房睇閃卡咋！少膽虫當堂鬆晒，「腦細有乜正嘢開心share呀？」

「正你個頭！我畀人呃呀！」淫賤黎牙痛咁聲︰「唉，都係好心累事！今朝落街，有個着背心短裙嘅姐姐仔攞張一千蚊問我有冇散銀。我見佢個身布都唔多塊咁可憐，咪諗住幫吓人囉！點知兌完先見到係03年版。唔講咁多，你幫眼睇吓真定假！」少膽虫造假就叻，點會識分真假？「腦細，計我話使乜分真假，兌番出去咪乜事都冇囉！」「醒目！不枉我恩賜你做腦腫。」淫賤黎邊陰陰嘴笑邊嗌︰「肥豪！你有冇一千蚊散銀？」

第一手消息請下載on.cc東網iPhone/iPad/Android/Windows Phone Apps